KALU TORANG MINTA

Yohanes 4:1-42

Ini cirita tentang pertemuan Kristus deng satu parampuang Samaria. Contoh bagus skali tentang bagimana Tuhan pe sayang for orang-orang yang berbeban. Kristus salalu sayang pa torang samua, maar banya kali torang nda sadar itu. 

Waktu tu parampuang Samaria datang di parigi, Tuhan bilang pa dia kase akang aer for Dia mominung. Tu parampuang itu takage lantaran nda biasa laki-laki Yahudi bacirita deng parampuang Samaria, maar lantaran Tuhan pe inisiatif dari situ dorang jadi bacirita, kong dari situ lei tu parampuang pe hidup berobah selama-lamanya. Tuhan kase tunjung pa tu parampuang Samaria apa yang paling dia perlu, kong dia dapa mangarti kalu cuma Tuhan yang boleh kase itu apa yang dia perlu skali waktu itu, dia pe keselamatan deng pengampunan dosa.

Spanjang dia pe hidop ni parampuang Samaria cari-cari kasih sayang deng penerimaan di samua tampa yang salah. Maar dia baku dapa deng Kristus yang kase pa dia air hidop yang boleh kase ilang dia pe rasa aus for kepenuhan rohani deng emosi.

Sama deng ni parampuang Samaria torang lei boleh datang pa Tuhan, kong trima apa yang Dia so sadia for torang samua. Itu yang boleh kase kepuasan sejati for torang. Cuma Kristus yang boleh isi torang pe kekosongan jiwa.

Ini dunia ini so punung deng rupa-rupa tawaran for manusia, cintalah, penerimaanlah, rasa percaya dirilah; rupa-rupa pokoknya. Maar kalu torang pe jiwa yang kosong, samua itu percuma. Cuma Tuhan yang boleh isi itu kekosongan. Lantaran itu cari baku dapa deng Kristus, Dia so tunggu pa torang samua.

Message from In Touch Ministry.