Lumapor sa minakaäto Gratifikasi

Direktorat Gratifikasi Komisi Pemberantasan Korupsi (KPK) minéémola warning wia sé PNS (pegawai negeri sipil) rior séa lumapor sa séa minakaäto gratifikasi, tanu e loit péila’néa “tanda trimakasé”  (bahaya tanda-tanda tuana) niwéé ni minakaäto ténder, e tiket laa waki luar negri niwéé ni rekan bisnis wia si tu’awéné, en oto niwéé ni makapunya bisnis tanumaé ucapan slamat, ka’apa si petugas si mawéé  surat izin makaäto “loit towaku” wia sé mesesiwo perijinan. Pokoknya, séité sé minakaäto sapa-sapa wia sé tou nu makélang bisnis ka’apa em walina-walina, sé léwo’ sa réi’ lumapor wia sé KPK. Sa séa réi’ lumapor, kaätoan séa sé ghumorem penjara ka’ayo seumur hidop, ka’apa makaäto denda ka’ayo satu miliar. Ni’in ka sé pemerénta sé mauli-ulit mererou’ eng korupsi wia negarata ni’in. Korupsi mawunu’ tou, mawunu’ sé oki’ wo sé tu’a, sumiwo sé tuama réi’la pepa’ayangan, wo sé wewéné mamuali paäta-atan. En réi’ toro paänggapen enteng gratifikasi ni’in. Lumapor sa minakaäto gratifikasi. Tabéa.

Préstasi Sulawesi Utara

Sulawesi Utara (Sulut) minakaato skor tertinggi Laporan Penyelenggaraan Pemerintahan Daerah (LPPD). Tuana e néipalakat witu peringatan HUT Otonomi Daerah XV waki kalasan Balai Kota Bogor, Jawa Barat (Mandak, Aperil 25 kawi’in). Witu urutan karua Sulawesi Selatan, katelu Jawa Tengah, iki’it perolehan nilai 2,9701 -- 2,9605 -- 2,8960. Tona’as Wangko’ Sarundayang iperaké-rakék ni Wakil Presiden wo em waya sé hadirin, ka préstasina mewangun Sulut.


“Em waya ni’in minamuali ka pemerinta wo masyarakat mapa’ayang mewali—wali, takar ni’itu, taruma kasé laker wia kesampetan né tou Sulawesi Utara,” tuana pokéi ni Sarundayang, wo makighenang wia sé warga Sulut, rior en sapa kinaayoanola iti’i, itu réi’ité maakarla witu, ta’an ipakiwangu-wangunla terus, takar witu te’un berikut, Sulut toro mamuali terbaik kangkasi. Tantumou em waya ni’in, en réi’te kewanungan witu angka ka’apa penghargaan, ta’an en uli-ulit kewanungan wia em waya sé tou maana’ wia Sulut.

Keupusen ni Empung Sulawesi Utara

“Keupusen ni Empung Sulawesi Utara,” tuana e néipatik witu Facebook status sé pirala Kawanua. Sé matarumakasé wia si Mapiara, ka réi’kan minamuali sapa-sapa witu wilaya Sulut, kumi’it berita em walolongan wangko’ mengéi kumawusla em pengéro’ 8.9 magnitude waki Jepang.

Rapa em weren en ari lima kawi’in (Jumat 11/3), sé melake-laker sé tou masosor em wanua witu kuntung. Badan Meteorologi dan Klimatologi minapawéé-wéé minéé warning wia sé tou maana’ witu e lilik lawanan rior séa sumingkir witu kakuntungan. Sé tou sé paloo’la sé mangartimou sa wawéan warning tsunami, niséa sé léwo’ sa réi’ sumosor eng kuntung. Ipakighenang wia nikita nu waya, nu si tou si lé’os sa si réi’ panik witu situasi tanu ni’in, wo kumi’it sé petugas pengarah tanu: polisi ka’pa tentara.

Baca selanjutnya

Pdt. Dr. A. F. Parengkuan si Kinérétou ni Empung

Pdt. Dr. A. F. Parengkuan, si paaka-akaan wia Gereja Masehi Injili di Minahasa (GMIM), si kinérétou ni Empung. Mina-Pdt. Parengkuan si timou waki Tondano, 21 Mei 1947 wo timayan waki ruma saki Bethesda Tomohon, Jumat 4 Maret 2011. Sia si niangkat mamuali pendeta waki Jemaat Pakuure, wilayah Tenga,16 Februari 1975. Minimpin ibadah toro ni’itu si Pdt. Wiliam Langi.  

Pdt. Dr. A. F. Parengkuan
(foto: fakultasteologiukit.blogspot.com)

Si kaawu keupusen ni Pdt. Geisye Balompapueng ye’i si minamualimi dosen Sejarah Gereja waki Fakultas Teologi UKIT. Wia sé mahasiswa sia si kalé’os, ta’an si tegas kangkasi. E riorla mamuali dosen waki Tomohon, sia si pendeta jemaat waki Imanuel Wanea Manado. Rumeriorla ni’itu, si minamuali TUG (tenaga utusan gereja) waki Halmahera, manamaé sia maajar mana Akademi Teologi wo mapendeta mana Gereja Masehi Injili Halmahera. Rinda wo té’és, laker pengalaman wo sigha’ witu tetu’tulan Ilmu Teologi, awesla kangkasi si kalé’os wia sé kaampitna wo sé kasuat tou, ni’itumou si pinéléng mamuali Ketua Sinode GMIM periode 2000-2004. Kumawusla ni’itu, si tinuru’pé’ kangkasi mamuali Ketua Majelis Pertimbangan Sinode GMIM, 2004-2008.

Witu em pinatouanami, kepa’arna mewewangun GMIM wo Minahasa. Méi nisia si réi’mou mapedam kasa sehat, kaso’ona sa réi’ kesampet em waya tugas-tugas. Si tou wangko’ tu’u. Witu en acara pangiboran en ari Minggu limangkoila, (6/3) minéi si Gubernur Sulawesi Utara, Sarundayang, wo jajaran Pemerinta Daera. Ibada penguburan pesesiwo waki Touliang, Kakas, en ari rua ni’in (Selasa 8/3). Nikita ta maarip ampit sé keluarga, si kaawuna, wo sé urang wo puyuna. Pakiwéén wia si Empung, rior kete-keterani wo iwééNami pangiboran wia niséa. Em patou-touana mamuali paki’i-ki’itan wia nikita nu tou Toudano.

Pos TNI Angkatan Udara Kalawiran sinerbu né tou Langowan

En ari lima, tanggal 21, sumendot ketaré, sé minabéanan sé enem anggota TNI AU wo sé epat warga sipil waki kompleks Pasar Cita Langowan, tuana tinulis witu pirala koran Kawanua. En réi’té minena’ witu masalah, ka witu eng kawo’odoanna, sé laa sé tou Langowan madémonstrasi waki Pos Penjagaan Kalawiran. Sé jinaga né pulisi wo sé anggota TNI madémonstrasi, ta’an sé réi’ mineketaang sé tou Langowan, wo irobé’néa em Pos Penjagaan ni’itu. Sé anggota sé réi’ toro masine’u en tou tuana, pokéi né paki’i-ki’itan né tou Langowan, tanu néitulis witu koran. Sé pirala anggota TNI AU iti’i sé tinaangou, tuana e néilila’la ni Kapten Tarigan, si Dansatpom TNI AU. Sé terlibat sé musti prosésen, tuana sia.