Tou Susa Makaato Beasiswa Ghumorem Unsrat

Laker sé pa’ar sumekola wo makaato gelar sarjana, ta’an kelakeran sé kiok réi’ kelaa ka sé réi’la e loit. Niséa ni’in maperlu bantuan. Néitulis witu koran sé tou susa nu mauli-ulit metetou – wo tumou tou – toro makaato béasiswa ghumorem Perguruan Tinggi.

Wawéan wo’o 700 kaayo 750 pelajar sé toro makaato beasiswa waki Universitas Sam Ratulangi, tuana tinulis witu eng koran. Niséa nu kumi’it program ni’in léwo’ sa réi’ mapasine’u sigha’ wo eren. Sa séa makaato nilai besaé wo indeks prestasinéa en réi’ néikaayo em persyaratan, sé tantu ikeraghragh.

Paarapen sé tarétumou sé toro bersaing sehat mamuali yang terbaik. Sé tu’a kangkasi sé musti masuport sé muda-muda, paturu’an rior séa mawéé ghénang lé’os witu em pasekola’annéa. Iki’it e néilila’ ni Rumokoy, si rektor Unsrat, niséa nu kaghorem wia em program ni’in, sé réi’ mawéar sapa-sapa, kaayo kesampetan pakuliaannéa.

Pos TNI Angkatan Udara Kalawiran sinerbu né tou Langowan

En ari lima, tanggal 21, sumendot ketaré, sé minabéanan sé enem anggota TNI AU wo sé epat warga sipil waki kompleks Pasar Cita Langowan, tuana tinulis witu pirala koran Kawanua. En réi’té minena’ witu masalah, ka witu eng kawo’odoanna, sé laa sé tou Langowan madémonstrasi waki Pos Penjagaan Kalawiran. Sé jinaga né pulisi wo sé anggota TNI madémonstrasi, ta’an sé réi’ mineketaang sé tou Langowan, wo irobé’néa em Pos Penjagaan ni’itu. Sé anggota sé réi’ toro masine’u en tou tuana, pokéi né paki’i-ki’itan né tou Langowan, tanu néitulis witu koran. Sé pirala anggota TNI AU iti’i sé tinaangou, tuana e néilila’la ni Kapten Tarigan, si Dansatpom TNI AU. Sé terlibat sé musti prosésen, tuana sia.